كو كلوكس كلان
| السنه | عدد الأعضاء |
|---|---|
| 1920 | 4,000,000 |
| 1924 | 6,000,000 |
| 1930 | 30,000 |
| 1980 | 5,000 |
| 2008 | 6,000 |
كو كلوكس كلان - بالإنجليزى Klu Klux Klan ، و بتختصر لـ " ك.ك.ك KKK " - . دى منظمه عنصريه موجوده فى امريكا اول ظهور ليها كان سنة 1865. كانت بتدعو للعنصريه للعرق الأبيض وبتعتقد ان الجنس الأبيض هوه الافضل فى كل حاجه والمفروض اى جنس تانى يموت. لبسهم المميز كان كله ابيض و كانوا بيغطوا وشهم و مش بيبان منهم غير عيونهم بس. المنظمه دى كل اعضائها كانو من البيض و من المسيحيين البروتستانت قابلتهم معارضه كبيره جدا فى كل العالم ومن المسيحيين البروتستانت التانيين و وصفوهم بالإرهابيين بإسم الدين والعرق.
المنظمه العنصريه استخدمت اللنشيه Lynching ( اعدام من غير محاكمه ) و قتلت ناس كتيره من السود فى امريكا و كانت بتستخدم فى الغالب المشانق او النار لقتلهم .
مراحل المنظمه
- المرحله الاول كان فى بدايات سنه 1865 فى ولايه تينيسى فى امريكا وكانت متكونه من شويه ظباط قدام فى الجيش الكونفدرالى بس مكملتش واتفككت فى بدايات سنه 1870
وبما ان دى كانت اول مرحله للمنظمه مكنش موجود عندهم تنظيم او ترتيب محدد وفى الفتره دى بدأت افكارهم تنتشر فى الجنوب على انهم تنظيم سرى وبما انهم كانو عنصريين وبيؤمنو بتفوق العرق الأبيض كان لبسهم كله ابيض وبيتكون من جلابيه كبيره بيضا وطاقيه كبيرة شبه القرطاس بتغطى راسهم ووشهم ومش بيبان غير عيونهم , وطول مراحل المنظمه التزمو باللبس ده مع تطوير بسيط فيه من ناحيه الرموز والرتب.
- المرحله التانيه كانت فى اول سنه 1915 وبدأت فى ولايه جورجيا ومع بدايه سنه 1921 بدأت تفكر وتتعامل بمفاهيم جديده وعلى اساسها بدأو يلمو متطوعين جداد معاهم ومع الوقت بدأ عددهم يكتر ويدخل معاهم ناس من كل مكان فى امريكا وكانت بتعتمد على نفس اللبس وضافو شويه كلام ورموز عليه وبدأو يحرقو الصليب بالنار قدام العبيد والناس اللى ضدهم وقتها علشان يخوفوهم ويرعبوهم وفى سنه 1920 الناس اللى فى المنظمه قالو ان عددهم وصل ل 4 مليون يعنى تقريباً 15% من عدد سكان امريكا وقتها وبدات تتفكك المنظمه تانى فى سنه 1944 بسبب تصرفات القاده الإجراميه ومشاكلهم الكتير لحد ماوصل عدد الأعضاء فى المنظمه ل 30 ألف فى سنه 1930 ومن يومها بدأت اعدادهم تقل لحد ما اتفككو خالص فى بدايات 1940.
فى سنة 1930 انفصل اعضاء من المنظمه و كونوا منظمه تانيه اسمها بلاك ليجيون The Black Legion و ارتكبوا جرايم ضد السود و من ضمن ضحاياهم كان أبو مالكوم اكس Malcom X قبل ما يتزعم حركته المناهضه للعنصريه.
- المرحله التالته بدأت سنه 1946 لما الحركات اللى بتناهض حركات حقوق المواطنين والتفرقه بدأت تستخدم اسم الكو كلوكس كلان مره تانيه خصوصاً مابين سنه 1940 وسنه 1950 وفى الفتره دى البوليس قبض على ناس كتير من المنظمه بتهم القتل لناس من منظمات حقوق الإنسان والمساواه وحتى لقتلهم الأطفال لما فجرو الكنيسه فى شارع رقم 16 فى بيرمنجهام. مع مرور الوقت الشعب الأمريكى والحكومه بدات تعتبرهم منظمه ارهابيه خطيره وفى سنه 1999 فى ولايه كارولينا الجنوبيه الحكومه عملت قرار اعلنت فيه منظمه كو كلوكس كلان على انها منظمه ارهابيه وهتتعامل على الأساس ده.